కాన్సర్ కాటేస్తానంటోంది – Non vegetarian food causes cancer in telugu

వేటమాంసం, ప్రాసెస్ మాంసాలు అతిగా తినటం వల్ల గుండె రక్త నాళాలకు సంబంధించిన సమస్యలు తలెత్తుతాయనీ, స్తూలకాయం వస్తుందనీ చాలా కాలంగా వైద్య నిపుణులు హెచ్చరిస్తున్నారు. అయితే వీటివల్ల రకరకాల కాన్సర్లు కూడా వస్తాయని ఇటీవల తేలింది.
ప్రపంచ ఆరోగ్య సంస్థ( డబ్ల్యూహెచ్ ఓ ) చెబుతున్నదేమిటంటే పాశ్చాత్య దేశాలలో 30 శాతం కాన్సర్లు రావటానికి అక్కడి ఆహారపు అలవాట్లకు సంబంధం ఉందట. ఇక మన దేశం లాంటి వర్ధమాన దేశాల్లో కూడా 20 శాతం కాన్సర్లకు , మనం తినే ఆహారానికీ లింకు ఉందట. మాంసం తినటం మానేసిన వారికి కాన్సర్ వచ్చే అవకాశాలు తగ్గిన్నట్లు కూడా పరిశోధనలు చెబుతున్నాయి.
ఆరు నెలల క్రితమే ప్రపంచ ఆరోగ్య సంస్థ ఒక అధ్యయన నివేదికను విడుదల చేసింది.అందులో ఒక జాబితాని సిధ్ధం చేశారు. ప్రమాదకరమైన కాన్సర్ కారకాల పేర్లతో కూడిన గ్రూప్-1 లో ప్రాసెస్డ్ మాంసాన్ని చేర్చారు. ఇక కాన్సర్ తెచ్చే అవకాశం ఉన్న ఆహార పదార్ధాల పేర్లతో కూడిన గ్రూప్-2ఎ లో రెడ్ మీట్(వేట మాంసాన్ని) పేర్కొన్నారు. గొడ్డు మాంసం, పంది మాంసం, పెయ్య దూడ మాంసం, గొర్రె మాంసం వంటివి రెడ్ మీట్ కిందకు వస్తాయి. ప్రపంచ వ్యాప్తంగా ఏటా దాదాపు 34 వేల మంది ప్రాసెస్డ్ మీట్ ఎక్కువగా తీసుకోవటం వల్లే మరణిస్తున్నారని తాజా అంచనా. అలాగే, దాదాపు 50 వేల మంది రెడ్ మీట్ అతిగా తినటం వల్ల ఏటా కాన్సర్తో ప్రాణాలు కోల్పోతున్నారు.

ప్రతి రోజూ తింటే

అతి సర్వత్రా వర్జయత్- దేనిలోనైనా అతి పనికిరాదు అన్న చందంలో మాంసం తినే విషయంలో కూడా ఇది పాటించాల్సిన సూత్రమే. ఎందుకంటే అరుదుగా మాంసం తినేవాళ్ళతో పోలిస్తే ప్రతిరోజూ మాంసం తినే వారికి పెద్ద ప్రేగు కాన్సర్ వచ్చే రిస్క్ ఉంది. అదీ ఈ రిస్క్ 3 రెట్లు ఎక్కువ అంటోంది హార్వార్డ్ విశ్వవిద్యాలయం. దీనికి కారణాలు అన్వేషిస్తే-మాంసంలో పీచు పదార్ధం కానీ, సమ్రక్షించే ఇతర పోషకాలు కానీ ఉండవు, పైపెచ్చు, మాంసంలో యానిమల్ ప్రోటీన్, శాచురేటెడ్ కొవ్వు ఉంటాయి. మాంసాన్ని ప్రాసెస్సింగ్ చేస్తున్నప్పుడు, హెచ్చు ఉష్నోగ్రతల్లో వండుతున్నప్పుడు కాన్సర్ కారకాలైన హెటెరో సైక్లిక్ ఎమైన్స్(హెచ్సీఏ) పాలీ సైక్లిక్ ఆరోమేటిక్ హైడ్రోకార్బన్స్(పీఏహెచ్) ఏర్పడతాయి. అవి కాన్సర్ రిస్క్ ను పెంచుతాయి. ప్రాసెడ్ మాంసంలోని అతి కొవ్వు, ఇతర జంతు ఉత్పత్తుల వల్ల హార్మోన్ల ఉత్పత్తి పెరుగుతుంది. దానివల్ల వక్షోజ కాన్సర్, ప్రొస్టేట్ కాన్సర్ వచ్చే అవకాశాలు ఎక్కువ.
ఇలాంటి కాన్సర్లు కూడా..
గొడ్డు మాంసం, పందిమాంసం, గొర్రె మాంసం లాంటివి అతిగా తిన్నా, ప్రాసెస్డ్ మాంసాన్ని అతిగా తిన్నా అన్నవాహిక, ఊపిరితిత్తులు, క్లోమం (ప్యాంక్రియాస్), పొట్ట, గర్భాశయం లోపలి పొర, ప్రొస్టేట్ కాన్సర్ వచ్చే అవకాశాలు ఎక్కువ.

ప్రోసెస్డ్ మాంసంతో పురీషణాల కాన్సర్

ఇటీవలి కాలంలో పురీషణాల క్యాన్సర్(కోలో రెక్టల్ క్యాన్సర్)ఎక్కువ అవుతుంది. ప్రోసెస్డ్ మాంసం అతిగా తీసుకున్నా, అతిగా ఉడికించినా మాంసాన్ని భుజించినా ఈ క్యాన్సర్ వచ్చే ప్రమాదముందని పరిశోధకులు తేల్చారు. ప్రాసెస్డ్ మాంసంతో ఎందుకు ముప్పంటే మాంసం పాడవకుండా ఉండటానికి సహజంగా కానీ, కృత్రిమంగా కాని, నైట్రేట్లు, నైట్రేట్ల లాంటి లవణాలను చేరుస్తారు. అవి మాంసంలోని పదార్ధాలతో రియాక్ట్ అయి క్యాన్సర్ కారక పదార్ధాలని ఉత్పత్తి చేస్తాయి. అవి మన డీఎన్ ఏ ను దెబ్బ తీస్తాయి. రోజుకు 50 గ్రాముల ప్రాసెస్డ్ మాంసం తినటం వల్ల పురీష నాళ క్యాన్సర్ వచ్చే రిస్క్ 18 శాతం పెరుగుతుందని తాజా అమెరికన్ అధ్యయనం వెల్లడించింది.

గ్రిల్డ్ మాంసంతోనూ చిక్కే

నేరుగా నిప్పుల మీద మాంసాన్ని వేయించటం(గ్రిల్డ్ మాంసం), కాలచటం వల్ల కొవ్వు ఆ వేడి నిప్పుల మీదకు చేరుతుంది. దాంతో, పాలీసైక్లిక్ ఆరోమేటిక్ హైడ్రోకార్బన్(పీఏహెచ్)తో నిండిన మంటలు వస్తాయి. సదరు పీఏహెచ్ లు ఆహారం తాలూకు ఉపరితలానికి అంటుకుంటాయి. వేడిపెరిగిన కొద్దీ మరిన్ని పీఏహెచ్ లు వస్తాయి. దాంతో ఉదర సంబంధమైన క్యాన్సర్లు వచ్చే రిస్క్ ఉంది.

అతి కొవ్వుతో రొమ్ము క్యాన్సర్

కొవ్వు అధికంగా ఉండే ఆహారపదార్ధాలు, పాల ఉత్పత్తులు, వేపుడు ఆహారపదార్ధాలు, తినటం వల్ల స్త్రీలలో మరింతగా ఈస్ట్రోజన్స్ ఉత్పత్తి అవుతాయి. వక్షోజాలలో, స్తీల సెక్స్ హార్మోన్లకు స్పందించే ఇతర అవయవాలలో క్యాన్సర్ కణాల పెరుగుదలను అది ప్రోత్సహిస్తుంది. కాబట్టి రొమ్ము క్యాన్సర్ వచ్చే ప్రమాదాన్ని నివారించాలంటే మాంసం, పాల ఉత్పత్తుల ద్వార అధిక కొవ్వు తీసుకోకుండా జాగ్రత్త పడాలి. అయితే మాంసాహారం తక్కువ కావటం వల్ల విటమిన్-బి-12, విటమిన్-ది తగ్గే అవకాశాలు ఉన్నాయి. ఇది గమనించి మితం హితం అన్న జాగ్రత్త తీసుకోవాలి.

NO COMMENTS